Македонската А репрезентација на 24 март на гости ќе го игра полуфиналето од баражот за пласман на Светското првенство во Катар 2022 против селекцијата на Италија (20.45 часот).

Наскоро нашиот селектор Благоја Милевски ќе го објави списокот на играчи за дуелот против актуелните европски шампиони во Палермо.

Победникот од овој меч на 29 март на гостински терен во финалето како последна пречка на патот кон Мундијалот ќе игра против Португалија или Турција.

Фановите на официјалниот сајт на европската фудбалска куќа (УЕФА) ги даваат своите гласови за тоа кој има поголеми шанси да триумфира на овој дуел.

Италијанците ја имаат фаворитската улога, бројките на УЕФА велат дека моментно 74% се во корист на играчите на Роберто Манчини, а само 26% за најдобрите македонски фудбалери дека ќе слават на стадионот „Ренцо Барбера“.

Досега двапати се сретнаа овие две селекции, минимално со 2:3 бевме поразени во Скопје на 9 октомври 2016, а ремизиравме 1:1 на 6 октомври 2017 година во Торино.