Од април годинава Црвениот крст на Град Скопје ќе започне да го спроведува проектот „Итно Копче“ со кој на почетокот ќе бидат опфатени шеесет повозразни лица.

Станува збор за уред, аларм, кој секогаш ќе го носат со себе и доколку се најдат во ситуација во која имаат потреба од итност со притискање на копчето ќе алармираат посебен тим кој веднаш ќе излезе на терен и ќе дојде на помош.

Услугата „Итно копче“ е во рамките на проектот ,,Развој на деловни услуги за интегрирана грижа и поддршка во Црвениот крст“, и ќе претставува 24 часовна услуга 7 дена во неделата.

За каква услуга всушност станува збор во Утрински брифинг разговаравме со Ивона Ѓорѓиева, психолог во сервисот „Итно Копче“.

-Станува збор за услуга која е нова во регионот, но во Швајцарија и во дел од европските земји се спроведува со години, затоа го имаме искуството од меѓународен тим кој ги обучува нашите тимови кои понатаму ќе работат на терен. Целта е да се обезбеди сигурност на постарите лица над 65 години, со тоа што секогаш ќе се најдат во состојба на итност можат да се јават во тимот на Црвен крст. Имаме обучени лица кои ќе доаѓаат на терен, ќе прават проценка што треба да се направи, вели таа.

-Нашиот тим поминува низ сериозни обуки за понатамошната работа. Во моментов се отворени нови работни позиции за работа во овој сервис „Итно копче“, потребни се возачи, животоспасувачи, телефонски оператори, психолози, социјални работници кои би биле дел од овој тим, додава Ѓорѓиева.

-Услугата ќе може да ја користат лицата над 65 години. Предност ќе имаат лицата кои живеат сами. Во оваа фаза ќе бидат вклучени 60 лица над 65 години, но таа ќе се имплентира на веќе постоечки корисници на услугата „помош и нега во домот“ во рамките на Црвениот крст, вели Ѓорѓиева.

Проследете го целиот разговор во видеото