Ѓоргиев: Не сме фаворити, но одиме на победа против Босна и Херцеговина
В среда (25 мај) со почеток од 20.15 часот во СЦ „Борис Трајковски“ – Скопје машката одбојкарска сениорска репрезентација на Македонија ќе го одигра првиот натпревар во Европската сребрена лига.
Во рамките од групата „Б“ избраниците на селекторот Ратко Павличевиќ ќе ја пречекаат селекцијата на Босна и Херцеговина. Противници во оваа група се и репрезентациите на Романија и Албанија.
Против албанските одбојкари одигравме два пријателски мечеви во Маврово, првиот го добивме со 3:1, а вториот го загубивме со 3:0.
Капитенот на нашата селекција Никола Ѓоргиев се надева и посакува победнички старт.
– Со нетрпение го очекуваме првиот натпревар против Босна и Херцеговина. Искрено не ја познаваме многу босанската селекција, бидејќи е многу различна во однос на минатата година. Имаат два нови примачи, два нови центри и ново либеро, мислам дека дијагоналата техничар коректор ќе биде иста. Одиме на победа, не сме фаворити, ќе се бориме за секоја топка, ќе го дадеме максимумот да ја израдуваме македонската публика и да ја отвориме оваа Европска лига со триумф – вели Ѓоргиев.