Ѓоковиќ пријавен за настап на Австралија Опен
Првиот тенисер на АТП ранг листата, Новак Ѓоковиќ се наоѓа на листата на тенисери кои се пријавени за настап на Австралија Опен.
Оваа одлука беше очекувана бидејќи Ѓоковиќ претходно го пријави настапот на АТП купот кој треба да се игра во Сиднеј, иако српскиот тенисер не сакаше да открие дали е вакциниран против коронавирус, што е услов за настап на првиот грен слем во сезоната и кој се игра во Мелбурн.
Сепак, Новак Ѓоковиќ се најде на листата на пријавени тенисери која ја објави организаторот.
Австралиските медиуми објавија дека сите тенисери и тенисерки кои се наоѓаат на списокот за настап или се вакцинирани или имаат право на исклучок.
Ова значи дека Ѓоковиќ во јануари идната година ќе се бори за 10 титула на Австралија Опен како и за рекордниот 21 грен слем трофеј во кариерата.
На листата на пријавени тенисери се наоѓаат и Данил Медведев, Александер Зверев, Стефанос Циципас, Андреј Рубљов, Рафаел Надал, Матео Беретини, Хуберт Хуркач, Јаник Синер, Доминик Тим…
Кај тенисерките, на листата на пријавени се наоѓа Ешли Барти како и сите тенисерки од топ 10 на ВТА ранг листата. Австралија Опен треба да се одржи од 17 до 30 јануари идната година.