Германците дадоа мислење како настанал пожарот во тетовската болница
По четири месеци чекање, во петокот пристигна извештајот од германските експерти кои дадоа свое мислење како настанал пожарот во тетовската модуларна болница. Извештајот, велат од ОЈО се преведува и тој процес се одвивал со големо внимание бидејќи во наодите имало многу стручни мислења од германските експерти.
За овој извештај, ОЈО велеше дека е важен сегмент од истрагата, за да се дојде и до точните виновници за пожарот во кој 14 пациенти кои се лекуваа од коронавирус го загубија животот. Сега, извештајот ќе се доведе во корелација со останатите докази кои ги прибраа македонските истражители и тимови, а преку кои се констатираше дека спој на струја за време на реанимација на пациент е причината за избивање на пожарот.
Германското вештачење е побарано преку меѓународна правна помош, што би значело дека тоа ќе може да се употреби и во евентуална судска постапка. Досега, завршени се три вештачења. Првото е направено од Министерството за внатрешни работи, од кое се утврди дека спој на струја за време на реанимација на пациент прегреал продолжен кабел по што настанал пожарот. Второто е од Технолошкиот факултет, за кое нема детали до какви сознанија е дојдено и третото е направено од електроинженер околу инсталациите во болницата.
Во страотниот пожар кој ја пеплоса модуларната болница во Тетово, со себе однесе и 14 животи на пациенти кои се лекуваа од коронавирус, но и членови на семејствата кои биле внатре. 12 лица беа спасени пред објектот целосно да изгоре.