Лесно може да се утврди кој внесен податок е лажен, коментира за „Слободен печат“ поранешниот директор на Државниот завод за статистика, Дончо Герасимовски, по написите дека македонски државјани што живеат во земјава, користејќи странски компјутерски адреси се попишуваат на апликацијата наменета за иселениците. Според него, одговорот ќе го даде внесениот матичен број.

-Постојната апликација е наменета само за нашите иселеници. Но, самата апликација нема систем да провери дали податоците се релевантни или веродостојни. Сепак, тоа лесно се проверува, преку внесениот матичен број, како и податоците од местото на живеење, односно општината што исто така треба да се наведе и тоа ќе претставува доволна потврда, вели Герасимовски.

Тој додава дека Заводот веднаш треба да се зафати ажурно со ваква проверка на податоците, бидејќи, како што вели, доколку се натрупаат, може да го забави процесот на попишување.

Претходно од Државниот завод за статистика порачаа дека ваквиот начин на попишување претставува кршење на Законот за попис, во членот за давање лажни податоци, кој предвидува и тригодишна затворска казна.