Кандидатот на СДСМ за градоначалник на Општина Центар, Горан Герасимовски, во вечерашното гостување на ТВ24 рече дека постои суштинска разлика меѓу неговата и програмата на неговата противничка, а тоа се конкретните решенија кои ги нуд за трите клучни проекти: сообраќајот, хигиената и урбанизмот.

„Моите три клучни пораки и проблеми коишто планираме првично да ги градиме, тоа е доволно паркинг места со конкретен број на паркинг места и конкретни места каде што ќе се градат истите и секако хигиената на повисоко ниво, а тоа е со поврзување на комуналното претпријатие ПОЦ со дополнителен сектор со комунална хигиена каде што ќе го зголемиме бројот на вработени и опрема за да ја подигнеме хигиената“, рече Герасимовски.

Тој потенцира дека нема да отстапи од „хуманата урбанизација“ и ќе се залага за побрзо донесување на ДУП-овите со кои, наместо габаритни градби, во општината ќе има градинки, училишта, културни центри и ново зеленило. За сообраќајот, Герасимовски рече дека ќе обезбеди резидентни паркинзи за станарите во Центар.

Тој додаде дека ќе работи исклучиво во интерес на граѓаните и затоа „секојдневно ќе одвојува по еден час за нив“. Мојата цел, рече Герасимовски, е „општината целосно да биде отворена за граѓаните, да има контакти да слуша и постапува по барањата и проблемите и тоа да се види во првите 100 дена од мандатот“. Само така ќе се врати довербата кај граѓаните, општина Центар треба да стане модерна и урбана со проекти во полза на граѓаните, смета тој.