Георгиевски: Мотор е потенцијален противник и во Лигата на шампионите
Вардарци му гостуваат на Мотор Запорожје во својот трет натпревар во СЕХА лигата, со што ќе го заокружат „пеколниот“ февруари, во коj одиграа пет натпревари досега, а имаа и неколку одложени дуели. Вардар досега има две победи во двата натпревари во СЕХА, но утревечер (20.15 ч.) против Мотор Запорожје ќе го имаат најтешкиот предизвик во регионалното натпреварување.
– Ни следи натпревар против Мотор во рамките СЕХА лигата. Овој период имавме многу средби, иако очекувавме вакво темпо, сепак тешко е за нас, но верувам и за другите екипи. Ни следи долг пат до Запорожје и сериозен противник. Мотор игра добро и во Лигата на шампионите, третопласиран е во тешка група. Од тоа што можевме да видиме, тие многу трчаат, постигнуваат многу голови и имаат квалитетна екипа. Го гледам како потенцијален противник во осминафиналето во Лигата на шампионите. Мора добро да се подготвиме, иако е дуел од раната фаза на СЕХА лигата, секоја победа носи дополнителна самодоверба и подобра атмосфера. Се надевам ќе се подготвиме добро и ќе извлечеме добар резултат – вели Гоце Георгиевски.