„Ѓаволска“ работа, Јунајтед за наследник на Солскјер го сака тренерот кој ги понижи и освои титула со Сити
Ново име на листата на потенцијални наследници на Оле Гунар Солскјер на клупата на Манчестер јунајтед.
Маурицио Покетино добива сериозна конкуренција за клупата на Манчестер јунајтед во името на актуелниот италијански селектор, Роберто Манчини, пишува римскиот весник „Република“.
Манчини веќе има работено во Манчестер, но во „синиот“ дел од градот и на Сити му ја донесе првата шампионска титула во 2012 година, а притоа триумфира и во ФА купот.
Во шампионската сезона, Роберто Манчини го понижи Манчестер јунајтед со убедливиот триумф од 6:1 во градското дерби.
Сепак, наредната 2013 година, поради серија на слаби резултати, Манчини доби отказ од Манчестер сити.
Италијанецот потоа го предводеше Галатасарај со кого триумфира во турскиот куп, по што се врати во Италија но авантурата на клупата на Интер нема да ја памети по добро. Потоа седна на клупата на Зенит со кого ја освои титулата во Русија, по што го презеде кормилото на италијанската репрезентација и ги препороди „аѕурите“.
Предноста на Манчини во однос на Маурицио Покетино кој исто така е сериозен кандидат за наследник на Солскјер, е искуството со работа во големи екипи и знае како се освојуваат трофеи.
Шансите на Манчини да седне на клупата на Манчестер јунајтед се зголемуваат доколку Солскјер си замине по завршување на сезоната бидејќи идното лето ќе се одигра ЕП по што Италијанецот ќе може да пристигне на „ОЛд трафорд“.
Доколку Солскјер добие отказ во текот на сезоната, тогаш главен фаворит за нов тренер е Маурицио Покетино.