Репрезентацијата на Аргентина продолжува со одличните игри на Мундобаскетот и во петтиот натпревар дојдоа до петтата победа, и тоа најзначајна со која си го обезбедија првтото место во групата И. „Гаучосите“ со 91:65 ја победија Полска и како првопласирани во својата група одат во четвртфиналето каде ги очекува или Шпанија или Србија.

Од друга страна Полска ќе биде втора во групата и во битката за полуфиналето ќе се сретне со подобриот од дуелот помеѓу Србија и Шпанија.

Аргентинците уште од самиот почеток го диктираа темпото како што нив им одговара и освен минамалната предност на стартот на Полска (4:5) во останатиот дел од средбата беа во водство. Уште на почетокот од втората четвртина дојдоа до двоцифрена предност, а работата ја завршија во третата четвртина кога направија серија од 24:2 за водство од 31 поен разлика (70:39).

Најефикасен во победничката репрезентација беше ветеранот Луис Скола со 21 поен, а Маркос Делија даде 12 поени. Кај Полска, Еј Џеј Слотер уфрли 16 поени.