Извршниот директор на Монца, Адријано Галијани, тврди дека врвните клубови во Европа ризикуваат банкрот заради недостаток на приходи поради пандемијата на коронавирус.

Поранешниот втор човек на Милан е загрижен за финансиската состојба во европскиот фудбал и вели дека фудбалот се соочува со „проблем што не е целосно разбран“.

– Само вирусот е тој кој може да го одреди датумот на почетокот (за продолжување на сезоната). Навистина е тешко. Еден ден морате да се вратите на тренинзите, а потоа ви требаат четири недели да бидете подготвени за да играте. Навистина не знам кога првенствата би продолжиле – рече Галијани за „Телеломбардија“.

Според него ситуацијата е потенцијално драматична дури и за најголемите фудбалски клубови:

– Не е само последната рата од ТВ правата која недостасува, нема приходи од стадион. Како и 400 милиони евра што УЕФА треба да ги распределува за европските купови. Врвните клубови во Европа ризикуваат банкрот, намалувањето на платите нема да биде доволно – додаде Галијани.