Поранешниот директор на Милан, Адријано Галијани кој во минатото беше една од најголемите „фаци“ во преодните рокови, секогаш кога нешто ќе каже привлекува големо внимание.

Овој пат сегашниот директор на второлигашот Монца, во интервју за „Кориере дела Сера“ зборуваше за случувањата во летниот преоден рок.
Интересно е што Галијани застана во одбрана на Ванда Нара, сопругата и менаџер на Маури Икарди, која сите ја обвинуваат за тоа што Икарди од капитен на Интер, сега тренира со младинците.

– Ванда е жртва на мачизмот кој владее во фудбалот. Кога и да каже нешто веднаш започнуваат коментарите во кои таа се обвинува за сè и сешто. Но, кога големите менаџери како Рајола и Мендеш се однесуваат идентично како Ванда, никој не се буни. Икарди? Фантастичен фудбалер и да можам веднаш би го довел во Монца – вели Галијани.

Галијани откри дека тој и Силвио Берлускони кој ја купи Монца, имаат една цел, за две години да ја внесат екипата во Серија А.

– Работам со истиот елан како и во минатото кога ги носев најдобрите светски фудбалери на Сан Сиро. Монца е клубот за кој навивав од дете, а кога Берлускони ме повика да работам за него во 1979 година му поставив само еден услов, да бидам слободен за викендите како би можел да се вратам во Монца – додава Галијани.