Просторот околу Националната и универзитетска библиотека „Св. Климент Охридски“ во Скопје  наликува на запуштена депонија. Расфрлани отпадоци и остатоци од облека се забележуваат пред влезот во библиотеката, но и остатоци од човечки измет. Неподнослива смрдеа се шири наоколу, додека ѓубрето се чини како со денови никој да не го собира.

За ужасот кој ќе ве пречека доколку одлучите таму да прочитате книга, алармираа граѓани на социјалните мрежи.

Кој е одговорен за одржувањето на хигиената во и околу објектот прашавме во  Управата на библиотеката од каде што ни беше посочено дека со години се соочуваат со овој проблем кој го предизвикуваат малолетни престапници, но и возрасни уживатели на опојни дроги кои тука ги задоволуваат своите физиолошки потреби.

– Библиотеката се наоѓа на површина од 13.000 квадратни метри, а има само три хигиеничарки кои се грижат за одржување на хигиената. И покрај тоа што редовно се чисти просторот околу библиотеката, сликата е ужасна и свесни сме за тоа, но не знаеме како да се справиме со граѓаните кои немаат развиена основна еколошка свест. Во дворот на библиотеката престојуваат целодневно цели семејства,  тука готват и доаѓаат со запрежни коли, а и своите физиолошки потреби тука ги задоволуваат. За оджрувањето исто така задолженижо е и ЈП „Паркови и зеленило“, велат од библиотеката.

Оттаму сметаат дека овој проблем би се решил единствено ако се направи ограда, но Националната и Универзитетска библиотека нема финансиски средства за да го реализира тоа.