Галерија „Ко-Ра“: Ликовна изложба посветена на планетата Земја
Во галеријата „Ко-Ра“ при Домот на култура „Кочо Рацин“ во Скопје од 15 мај е отворена групната мултикултурна и мултимедијална изложба посветена на Деновите на пролетта – Денови на екологијата. Тематската изложба обединува разнородни сензибилитети и изразни форми, разнородни генерации и ентитети, со што се акцентира утилитарното значење на оваа проблематика со есенцијално значење за опстојувањето на планетата Земја.
Преку слики, скулптури, графики, фотографии, колажи, инсталација и видеопроекција се претставени 20-ина автори во салонот на галеријата, но и виртуелно на социјалните мрежи.
Изложбата е со наслов „Ги сакам дрвјата – ги сакам шумите – ја сакам нашата планета Земја“, може да се посети со почитување на мерките за заштита од коронавирусот, а куратор на поставката е Виолета Калиќ, историчар на уметноста и стручен соработник за визуелни уметности, дизајн и архитектура во Домот на културата „Кочо Рацин“.
(Текстот е објавен во „Културен печат“ број 32, во печатеното издание на „Слободен печат“ на 23-25 мај 2020)