Футсалците ги дознаа ривалите за пласман на ЕП 2022
Доколку македонската најдобра футсал репрезентација ја совлада Англија во бараж натпреварите, ќе се најде во квалификациската група 4 со селекциите на Романија, Србија и Босна и Херцеговина за пласман на Европското првенство 2022 година.
Квалификациите ќе се играат од 6 декември годинава, до 14 април 2021. Селекторот на нашите најдобри футсалци, Васко Скендеровски вели дека најважно за нас е да го поминеме бараж предизвикот против Англија.
Потсетување дека годинава во претквалификациската група во СЦ „Јане Сандански“ – Скопје го освои второто место, со победа над Велс (1:0), а пораз од Норвешка (1:2).
Натпреварите ќе се организираат во Скопје на 8 и 9 ноември 2020 година.
– На прв поглед групата е поволна, но противниците се исклучително силни. Уште повеќе што ние се наоѓаме во ситуација кога не смееме да се ставаме во улога на фаворит против било кој противник. Но, за нас најважно во моментов е да се подготвиме најдобро за бараж натпреварите против Англија и да ја оствариме првичната цел, а тоа е пласманот во главната натпреварувачка фаза.
По рејтинг ќе бевме во третиот барабан за квалификациската група, но УЕФА веќе ги одреди репрезентациите кои ја минаа претквалификациска фаза. Се надевам дека ќе бидеме подготвени, здрави и без повредени играчи и повторно ќе се бориме за висок пласман во квалификациите – вели Скендеровски.