„Фуријата“ пресилна за кошаркарските надежи
Кошаркарската репрезентација на Македонија до 16 години е поразена од селекцијата на Шпанија со 59:86 на Европското првенство А-дивизија што се одржува во Скопје и во осминафиналето оди како третопласирана од групата.
Победата која ги однесе во нокаут фазата, кошаркарите ја остварија над Црна Гора во првото коло, по што следеа порази од Грција, и денеска од Шпанија.
Во осминафиналето македонските кадети ќе играат против селекцијата на Турција.
Шпанците победата ја обезбедија уште во првото полувреме во кое направија предност од 26 поени (22:48) по што рутински го одработија второто полувреме за конечни 59:86.
Никола Јаничиќ со 12 поени и Стефан Стојковиќ со 11 поени беа најдобри кај Македонија, додека кај Шпанија се истакнаа Марио Сент-Супери со 16 и Гонзало Фернандез со 14 постигнати поени.