Фудбалерите останаа на 68. место на ФИФА ранг листата
Македонската фудбалска репрезентација очекувано си остана на 68. место на ФИФА ранг листа која е објавена денеска.
Македонија има 1347 бода и на ранг листата нема промени поради прекинот на фудбалските активности предизвикани од кризата со коронавирусот.
Избраниците на Игор Ангеловски требаше на 26. март да го играат полуфиналниот дуел од плејофот во Лигата на Нациите преку кој се брка и настап на Европското првенство, но натпреварот е одложен на неодредено поради пандемијата со коронавирусот.
На врвот на ФИФА ранг листата останува Белгија со 1765 бода, пред Франција со 1733 бода и Бразил со 1712 бода. Англија е на четвртата позиција, а најдобрите 10 селекции според ФИФА го заокружуваат Уругвај, Хрватска, Португалија, Шпанија, Аргентина и Колумбија.