Фудбалерите не се машини за да ги палите и гасите како вие сакате
УЕФА на состанокот со националните федерации донесе одлука завршувањето на сезоните во најсилните лиги и Евро куповите се приоритет, но многумина се побунија сметајќи дека фудбалот во овие моменти е небитен.
Сите национални првенства во Европа освен тоа во Белорусија, се суспендирани поради пандемијата на коронавирусот, но се бара начин како и дали да продолжат.
УЕФА на завчерашниот состанок со сите земји членки донесе одлука со која најсилните пет лиги и Лигата на шампионите се приоритет и треба да се доиграат до крај кога ќе се овозможат услови.
Многумина со побунија на ваквата одлука сметајќи дека фудбалот е најмалку важен во овие моменти, а еден од најгласните е претседатело на Сампдорија, Масимо Фереро кој притоа ги нападни колегите од Серија А.
– Наместо да се најде заедничка стратегија, сите ги изнесуваат своите проблеми и ставови, велат: Сакаме да играме за Скудетото, не сакаме да одиме во Серија Б. Сите нешто зборуваат за продолжување на сезоната. Нашите екипи се повеќе личат на УЕФА.
Се трошат часови на видео состаноци наместо да се најде заедничка стратегија и да се реши проблемот. Замислете го случајот со Маноло Габијадини. Беше позитивен на коронавирус но се опорави. И како јас на него сега да му кажам дека во јуни повторно ќе игра? Па не е машина за да го палите и гасите кога на вас ви одговара. Што ќе си помисли Маноло? Кој би дошол на стадион? Можеби навивачи со маски… – изјави гневниот Фереро.
Токму Сампдорија беше клубот каде имаше неколку фудбалери кои беа позитивни на коронавирусот, а екипата донесе одлука да не дава соопштенија за да не крева паника во јавноста.
– Би било корисно да разберат сите дека дојде време да направиме големи реформи во цела Италија. На почетокот никој не обрнуваше внимание на овој невидлив непријател, но јас знаев и зборував дека сè ќе се промени. Сега сите ги почитуваме правилата, сите сме во своите домови каде слушаме страшни вести – вели Фереро.