Граничната агенција на ЕУ, Фронтекс привремено ги прекина операциите во Унгарија, потврди портпаролот на организацијата, со седиште во Полска.

Потегот следеше затоа што Унгарија продолжи да ги враќа мигрантите во Србија, спротивно на декемвриската одлука на Европскиот суд на правдата, пренесува „Еуобсервер”, додавајќи дека сите прекршувања ги регистрирала невладината организација Хелсиншки комитет за човекови права.

– Раководството на Фронтекс донесе одлука и ќе ги прекине сите активности во Унгарија, рече неименуван претставник на ЕУ.

Хелсиншкиот комитет за човекови права објави дека 4.400 мигранти се вратени во Србија од декември, барајќи од шефот на Фронтекс, Фабрис Лежери, да ги повлече силите на Агенцијата од Унгарија.

Во писмо упатено до Унгарија на почетокот на овој месец се повикува унгарската Влада да одговори зошто го прави тоа, но, како што се наведува, тоа сè уште не е сторено.