Франција во минатата година со највисок јавен долг од Втората светска војна
Јавниот долг на Франција лани бил на највисоко ниво од Втората светска војна поради пандемијата на коронавирусот и економската криза што следуваше. Ова го објави француската статистички служба.
– Јавниот долг на Франција во 2020 година е еднаков на 115,7 отсто од годишниот БДП, а буџетскиот дефицит изнесува 9,2 отсто од БДП – највисоко ниво од 1949 година, соопшти Статистичката служба Insee.
Во 2019 година., пред избувнувањето на ковид -19, долгот на француската влада беше 97,6 отсто од БДП, а буџетскиот дефицит беше 3,1 отсто.
Владата очекуваше уште полоши бројки, со дефицит од 11,3 отсто и долг од околу 120 отсто.
Пандемијата ја разби француската економија, која се намали за 8,2 отсто во 2020 година, принудувајќи ја владата да обезбеди огромна деловна поддршка за да избегне банкрот и масовни отпуштања.