Франција: Владата почна двегодишен експеримент со употреба на марихуана во медицински цели
Француската Влада денеска почна двегодишен експеримент со употреба на марихуана во медицински цели за нејзина евентуална легализација во иднина.
– За време на тој период околу 3.000 пациенти ќе користат препарати на база на канабис со цел да се испитаат позитивните дејства на билката на одредени болести, а нивното лекување ќе го следи државната агенција за лекови, соопшти француското Министерство за здравство.
Пациентите ќе добиваат препарати само на лекарски рецепт и во болничките аптеки, а првиот таков рецепт е издаден денеска во универзитетската болница во Клермон-Феран на југот на Франција.
– Целта на експериментот е да се соберат податоци за ефикасноста и безбедноста на терапијата со марихуана и да се подготви логистика за евентуална идна дистрибуција, соопшти Министерството.
Таков вид на лекување е овозможен за оние кои боледуваат од тешки болести, како рак, нервни заболувања, поедини облици на епилепсија и за лицата на палијативна нега.
Неколку европски држави веќе ја легализираа марихуаната.
Францускиот парламент го одобри проектот уште во 2019 година, но неговата реализација беше одложена поради пандемијата на ковид-19.