Седум француски семејства ја тужат социјалната мрежа „ТикТок“, обвинувајќи ја дека ги изложила нивните деца на штетни содржини, поради што две од нив извршиле самоубиство на 15-годишна возраст.

Во тужбата се вели дека алгоритамот на „ТикТок“ ги изложил седумтемина тинејџери на видеа кои промовираат самоубиство, самоповредување и нарушувања на исхраната, рече адвокатката Лора Бутрон-Мармион. Таа вели дека ова е прва вака групна тужба против кинеската социјална мрежа во Европа.

„Родителите сакаат правната одговорност на „ТикТок“ да биде признаена на суд. Ова е комерцијална компанија која нуди производ на корисници, кои, згора на тоа, се малолетни. Затоа таа мора да одговара за недостатоците на својот производ“, изјави Бутрон-Мармион.

„ТикТок“ ги отфрла обвинувањата дека го оштетува менталното здравје на децата и тврди дека инвестирал во мерки за заштита на младите корисници на апликацијата.