Ограничувањето на цените на енергенсите во Франција е продолжено до крајот на оваа година, објави премиерката Елизабет Борн.

Со заштитните тарифи, кои првпат беа воведени во ноември минатата година, цените на бензинот беа замрзнати на ниво од октомври 2021 година, а растот на струјата исто така беше ограничен на максимални 4,0 отсто. Оваа мерка требаше да истече на 30 јуни, но сега е продолжена, јавува порталот connexionfrance.com.

Премиерката Борн рече дека уредбата за продолжување на споменатата мерка ќе биде објавена во наредните денови.

„Ограничувањата на цените им обезбедуваат на потрошувачите гарантирани тарифи во Франција, а државата е таа која ја плаќа разликата во однос на пазарните цени, кои очигледно значително растат во Франција и во другите европски земји“, се вели во соопштението на Кабинетот на францускиот премиер.

Истражувачкиот центар Бројгл со седиште во Брисел проценува дека Франција ќе потроши 38 милијарди евра за мерки наменети за ограничување на растот на цените.

Француската министерка за енергетска транзиција Агнес Пани-Рунашер рече дека Франција би можела да продолжи без руски гас се додека резервите на течен природен гас (LNG) на земјата се доволни.

„Во апсолутна смисла… би можеле да направиме без руски гас, под претпоставка дека сите испораки на ТПГ пристигнуваат на време и дека можеме лесно да ги надополниме нашите стратешки залихи“, изјави таа за радиото BFM Business во четвртокот.