Силно невреме со обилни врнежи од дожд вечерва го зафати Кавадарци, при што од невремето биле поплавени подруми од куќи и повеќе улици, известија од Центарот за управување со кризи (ЦУК).

„Вечерва подрачјето на Кавадарци го зафати невреме проследено со обилни врнежи на дожд. Од невремето поплавени се десетина подруми од куќи, како и средишниот дел од главната ул. 7 Септември, на која во моментот три екипи со механизација работат на расчистување, а за испумпување на водата од поплавените подруми на терен се екипи од пожарната од Кавадарци со 2 пумпи и екипа од Комуналец од Кавадарци со две пумпи“, известија од ЦУК.

Градоначалникот на Кавадарци Митко Јанчев објави фотографии и снимки од поплавените улици во градот и ги повика сите граѓани кои имаат проблем од невремето да пријават на телефонскиот број 13 300.

Исто така, Јанчев извести дека интензивно се работи на перење и чистење на сите сливници на улиците ширум градот, потенцирајќи дека службите од ЈП Комуналец и ТППЕ Кавадарци се на терен.