ФОТО+ВИДЕО | Пендаровски: Со меѓусебна почит и традиционално пријателство изградивме одлични македонско-полски односи
Во Вила Водно во тек се средбите на претседателите на Северна Македонија и на Полска, Стево Пендаровски и Анджеј Дуда и придружните делегации. Полскиот претседател кој престојува во официјална посета на земјава, беше пречекан од Пендаровски со со највисоки државни и воени почести.
– Добредојде за полскиот претседател Анджеј Дуда. Церемонија со највисоки државни и воени почести по повод неговата официјална посета на Северна Македонија. Со заеднички напори и посветеност изградивме одлични македонско-полски односи и плодна соработка во изминатите години, врз основа на меѓусебна почит и традиционално пријателство, напиша претседателот Пендаровски на фејсбук по пречекот на неговиот полски колега.
Предвидено е двајцата претседатели да одржат заедничка прес-конференција.
Пендаровски и Дуда ќе присуствуваат и ќе имаат обраќања на „Македонско-полскиот бизнис форум“ што ќе се одржи во хотел Мериот, а ќе положат и венци на гробот на Гоце Делчев во црквата „Св. Спас“.
Во рамки на официјалната посета на Република Северна Македонија, претседателот Дуда ќе има средби и со претседателот на Собранието, Талат Џафери и со претседателот на Владата, Зоран Заев.
