Пар гумени патки денеска се појавија на пристаништето Викторија во Хонг Конг, како дел од уметничката инсталација „Double Ducks“ („Двојни патки“) на холандскиот уметник Флорентијн Хофман, кој вели дека се надева дека патките ќе му донесат среќа на градот, пишува „Ројтерс“.

Жолтите патки на надувување, високи 18 метри, ќе пловат на пристаништето две недели и доаѓаат една деценија откако уметничката инсталација „Rubber Duck“ („Гумена патка“) на Хофман се појави во регионот и го привлече вниманието на хонгконшките жители.

Хофман рече дека неговиот пар патки претставуваат „двојна среќа“ и дека носат нова возбуда во Хонг Конг.

„Се надевам дека (патките) ќе донесат исто толку големо задоволство како во минатото. Мислам дека е време да ја вратиме двојната среќа во овој свет, каде што страдавме од пандемија, војни и политички ситуации“, вели уметничкот.

Флорентијн Хофман го започнал овој уметнички проект во 2007 година и оттогаш има поставено повеќе инсталации во Амстердам, Баку, Ломел, Осака, Сиднеј, Саун Пауло и Хонг Конг. Секоја гумена патка се пресоздава локално, па оваа јавна уметност е наменета да биде привремена.