ФОТО+ВИДЕО: На Галичица пожарот активирал стара експлозивна направа, Магаро небезбеден за качување
Пожарот кој од вчера се шири на падините на планината Галичица, на албанска територија и кој во текот на денешниот ден се прошири и на тревнатите делови на планината во пограничниот појас, попладнево предизвика експлозија, најверојатно од стара експлозивна направа, заостаната од балканските или од Првата светска војна.
До неговото целосно гаснење врвот Магаро (2255) и неговата околина не се безбедни за искачување и движење, информираат од Центарот за управување со кризи.
„Во моментов се враќаме од хеликоптерско извидување на пожарот кој во текот на денешниот ден се појави на сртот на планината Галичица а кој се уште гори во граничниот појас на територијата на Албанија, со голема веројатност во текот на ноќта да навлезе и на наша територија“, информира Илија Бојаровски, портпаролот на Центарот за управување со кризи.
Тој инфомираше дека во текот на денот на Галичица гореше трева, но дека постои можност пожарот да се спушти кон пониските делови на планината и да ја загрози високата букова шума од страната на Преспанско и од страната на Охридско Езеро.
„Карактеристика за овој пожар е силната експлозија која се слушнала попладнево, а за која се претпоставува дека е предизвикана од, активирана од огнот, експлозивна направа, најверојатно мина или друг виде ксплозивно средство, остаток од борбите коишто се воделе на ова подрачје во Балканските или Првата светска војна“, изјави Бојаровски.
Од ЦУК денес предупредија дека евентуалното гаснење на овој пожар од копно дополнително е комплициран поради тоа што е познато дека на тој терен има заостанати мини и друго артилериско оружје од минатиот век, што би ја загрозило безбедноста на противпожарните единици и спасителни служби.
Главниот штаб за управување со кризи дополнително ќе одлучи на кој начин ќе се гасне овој пожар при тоа на прво место ставајки ја безбедноста на посадата на хеликоптерите, како и безбедноста на луѓето кои ќе учествуваат во гаснењето на пожарот од земја, информираа од ЦУК.