Американскиот претседател Џо Бајден синоќа ги додели Националните медали за уметности и одликуваше повеќе повеќе уметници и филантропи за нивниот придонес во американското општество.

Меѓу одликуваните се најде и рок-музичарот Брус Спрингстон, кому Бајден, алудирајќи на песната „Born To Run“, шеговито му рече: „Брус, некои луѓе, едноставно, се родени да трчаат“.

Комичарката Џулија Луис-Драјфус, чија телевизиска серија „Veep“ ја прикажува потпретседателската позиција, должност на која беше и самиот Бајден во минатото, беше една од оние кои беа одликувани со Национален медал за уметности.

„Таа го прифаќа животниот апсурд со апсолутна духовитост и се справува со вистинските пресврти во животот со апсолутна благодат. Таа е мајка, таа преживеа рак, таа е пионер во комедијата, таа е американски оригинал“, рече Бајден за Луис-Драјфус.

Актерката Минди Калинг, која беше една од главните ѕвезди на познатиот ситком „The Office“, исто така, доби Национален медал за уметности.

Кога Бајден го претстави романсиерот Колсон Вајтхед пред публиката, претседателот нагласи дека писателот е двократен добитник на Пулицерова награда, американска награда која се смета за највисоко признание во областа на новинарство во печатените медиуми, литературни достигања и музичка композиција.

„Ќе пробам и јас да победам двапати по ред“, рече Бајден, алудирајќи на своите амбиции повторно да се кандидира на претседателските избори во 2024 година.

Меѓу останатите добитници на Националните медали се најдоа и пејачката Гледис Најт, модната дизајнерка Вера Ванг, историчарот Волтер Исаксон и писателите Ејми Тан, Ен Пачет и Тара Вестовер, меѓу другите.