Од САД постојано повикуваат за продолжување на дијалогот за нормализирање на односите меѓу Косово и Србија.  Во меѓувреме, американскиот дипломат Филип Рикер во интервју за Гласот на Америка рече дека САД се подготвени да се вклучат во разговорите меѓу Косово и Србија. За ова, Рикер изјави дека зборувал и со државниот секретар Мајк Помпео.

За тоа дека САД навистина сакаат да се вклучат директно во дијалогот меѓу Приштина и Белград, покажува и фотографијата од министерската средба за верски слободи, организирана од Соединетите Американски Држави, пренесува Газета Експрес.

Според истиот медиум на оваа фотографија во попривилегирана позиција се наоѓаат  Косово и Србија, бидејќи косовскиот министер за надворешни работи, Беџет Пацоли и неговиот српски колега, Ивица Дачиќ се фотографирани до американскиот секретар Помпео.

Се чини дека оваа доближување на Косово и Србија од страна на САД не е случајно, ако се земат предвид последните случувања и обиди за продолжување на дијалогот помеѓу Приштина и Белград.

Напори за повторно започнување на дијалогот меѓу Косово и Србија, прават и францускиот претседател Емануел Макрон, како и германската канцеларка Ангела Меркел.

Во интервју за Газета Експрес, српскиот аналитичар Душан Јајниќ изјавил дека такво нешто тие прават во целосна координација со Соединетите Американски Држави.