Седум вепри се „хумано евтаназирани“ на улиците низ Хонг Конг во организиран лов откако диви свињи агресивно упаѓале во урбаните средини околу финансискиот кварт. Ловот бил итно организиран откако пред една недела дива свиња се нафрлила на полицаец и го гризнала.

Жителите на мегаградот со години привикнале да го делат асфалтот и бетонот со дивите свињи што се спуштаат од околината, се воздржуваат да не ги гонат, па дури и им оставаат храна. Во надворешните квартови, оддалечени половина час возење од финансискиот центар, речиси секојдневно може да се забележат диви свињи и прасиња меѓу зградите и околу контејнерите за ѓубре, душкаат луѓе со торби, се спуштаат во метрото, па дури и бркаат автомобили, како улични кучиња. Толку многу се прилагодиле, што уредно чекаат на семафор да се запали зелен сигнал за да преминат.

Но, властите утврдиле дека свињите „го преминале прагот на толерантност“ и им објавија еднодневна војна на натрапниците.

– Припадници на Ветеринарски служби, вооружени со пушки со приспивни стрелки, успеаја да заробат седум диви свињи, кои потоа беа хумано усмртени со смртоносна инјекција – соопшти Одделението за земјоделство, рибарство и резервати.

Низ Хонг Конг имало повеќе од 30 напади од диви свињи во изминатите неколку години. Пред една недела вепар турнал полицаец и го гризнал за ногата, а потоа бегајќи паднал од катна гаража и угинал. По тој инцидент администраторката Кери Лам најави дека ќе ги зголеми казните за луѓето што ги хранат дивите свињи, привлекувајќи ги во градот.

Властите во Хонг Конг вообичаено се воздржуваат од лов, како екстремна мерка. Стандардните протоколи се слични како оние за уличните кучиња во европските градови – специјални служби ги заробуваат свињите, ги стерилизираат и ги оставаат во ненаселени места. Дивите свињи, пак, кои во Хонг Конг не се заштитени ѕверки, упорно се спуштаат во градот, особено откако движењето на луѓето беше строго ограничено поради пандемијата на ковид-19. Според новите проценки, само во урбаната средина ги има околу 3.000. Светот лани го обиколи фотографијата на семејство диви свињи како се брчка во фонтана меѓу облакодерите во финансискиот центар.

Групите за права на животните остро го осудија ловот на седумте диви свињи.

– Проблемот го направи владата, која не успеа да издвои доволно средства за да го решиме проблемот со животните. Сега свињите ја платија цената – вели Рони Вонг од Центарот за грижа за дивите свињи.

Администраторката Лам одговори дека лично знае колку дивите свињи им се при срце на жителите, но и дека нејзина обврска е да се грижи за безбедноста на граѓаните.

– Како одговорни власти, моравме да преземеме акција – изјави Лам.