ФОТО+ВИДЕО: Демонстранти против полицискиот час во Холандија запалија центар за тестирање за коронавирус
Младите кои ноќеска протестираа во Холандија заради воведување на полицискиот час запалиле центар за тестирање на коронавирус во селото Урк и ја гаѓале полицијата со ракети за огномет.
Полицијата денеска соопшти дека казнила повеќе од 3.600 луѓе низ целата земја заради прекршување на полицискиот час, воведен заради спречување на пандемијата и дека уапсила 25 лица од таа причина или заради насилство.
Полицискиот час од 21.00 до 04.30 часот ноќеска беше за прв пат на сила во целата Холандија.
На снимката од приморското село Урк, 80 километри североисточно од Амстердам, се гледа како младите насилно влегуваат во центарот за тестирање на коронавирус, пред да го запалат.
Полицијата и локалните власти денеска остро го осудија насилството, наведувајќи дека демонстрантите „гаѓале со ракети за огномет и камења, уништувале полициски возила и запалиле објект за тестирање“.
„Ова не само што е неприфатливо, туку е и шлаканица, особено за локалните здравствени власти кои во центарот за тестирање прават се што можат за да им помогнат на луѓето од Урк“, наведоа властите.
Полицијата во Амстердам се подготвува за денешниот протест на плоштадот на кој пред една недела имаше судири меѓу демонстрантите и полицијата.
Извор: Бета.рс