Уште една сцена како од Дивиот Запад е забележана утрово на улиците на Тетово – стадо од десетина коњи околу седум часот спокојно пасеа во зеленилото на кружниот тек од булеварот „Илинден“, веднаш до плоштадот во строгиот центар на градот.

На фотографиите, кои ни ги испрати читател, се гледа и дека коњите на необичното место за пасење ги придружуваат и неколку улични кучиња – редовните „жители“ на овој и сите други делови од градот.

Во околината на Тетово, особено на Шара и блиските планини Сува Гора и Жеден, коњите и денес се многу одгледувано домашно животно, но според повозрасните жители, тие одамна не можеле олку често да се гледаат симнати во градот.