Најпопуларната манифестација на домашната сцена, „Златна бубамара на популарноста“, вечерва по 28. пат се одржува во преполната арена „Борис Трајковски“.

Вечерта традиционално ја отвори првиот човек на „Бубамара“, Ранко Петровиќ, со воведен говор, по што следеше краток стенд-ап настап на актерот и комичар Жарко Јовановиќ, кој со својот хумор ја загреа атмосферата и ги насмеа илјадниците присутни.

Првата Златна бубамара беше доделена на Ана Петановска за најдобар и најперспективен вокал, а честа да ја врачи оваа награда, по цели 26 години, ја имаше Сашо Гигов – Гиш. Двајцата заедно го отпеаја безвременскиот евергрин „Моја гитара“, предизвикувајќи емотивни реакции кај публиката.

По краткиот музички блок, на сцената се појави актерот Тино Костадиновски, со што вечерта и официјално беше прогласена за започната. Громогласниот аплауз и заразната смеа беа најдобриот показател дека и ова, 28. издание, ќе биде вечер исполнета со хумор, музика и незаборавни моменти.