ФОТО | Се гради автопатот Скопје – Блаце: Два километри за 14 милиони евра, другите 10,5 на кредит
Работите на патниот правец Скопје – Блаце во должина од 12 километри веќе се започнати и се одвиваат според предвидената динамика, се уверија денеска првиот вицепремиер и министер за политички систем и односи меѓу заедниците, Артан Груби, министерот за транспорт и врски, Благој Бочварски и директорот на ЈП за државни патишта Ејуп Рустеми со увид на самото место.
-Денеска заедно со министрите извршивме увид во градежните работи на автопатот Скопје – Блаце, а од Изведувачот и Надзорот бевме информирани дека во моментов се работи на земјени работи, односно ископ на усек и отпочнување на активности за насип, се работи на техничко решение за дисклокација на подземните инсталации сопственост на Телеком, ЕВН, А1 и МВР кои се во завршна фаза и припреми за бетонски активности (пропусти, натпадници и подпатници). Експропријацијата е завршена, а вредноста на проектот изнесува 881.724.867,03 денари со ДДВ или 14,26 милиони евра, средства обезбедени од Јавното претпријатие за Државни патишта, информираше директорот на ЈПДП Ејуп Рустеми.
-Модерното автопатско решение ќе стави крај на ерата на лошата регионална инфраструктура и ќе овозможи брз транспорт на стоки и услуги меѓу Северна Македонија и Косово. Капиталните инвестиции надминуваат 15 проценти од буџетот и затоа се важни овие инвестиции во патната инфраструктура, рече министерот за транспорт и врски Благој Бочварски.
За вицепремиерот Груби, автопатот Скопје – Блаце е важен за трговско и економско поврзување со Косово и го нарече „потпис на оваа влада во овој момент“.
Изведувач на работите на автопатот во должина од 12 километри е Гранит, а надзорот е на ГИМ. Предвидена е изградбата на автопатот Скопје -Блаце да се одвива во две делница. Првата од граничниот премин Блаце до село Блаце, а втопрата од селото до клучката Стенковец во должина од 10,5 километри ќе се финансира со заем од ЕБОР и инвестициски грант од ВБИФ. За подолгата делница во моментов се изработува проектна документација, и се врши теренско – геофизичко и геотехничко истражување на трасата.