На улицата „Козара“ во Капиштец, на која во моментов во тек е изградба на повеќе згради на местото на некогашните двокатни куќи, сепак не започна реконструкција, како што беше најавено пред неколку месеци. 

Во јули градоначалникот на Општина Центар, Саша Богдановиќ, потпиша барање за спроведување постапка за јавна набавка за обнова на улицата, како што тогаш рече, по барање на жителите.

Реконструкцијата  беше најавена како дел од големата летна градежна офанзива со која до крајот на летото требаше да бидат обновени 37 улици на територијата на Центар.

На прашањето од „Слободен печат“ зошто се планира реконструкција во услови кога истовремено се градат неколку згради од двете страни на улицата, по што задолжително ќе следат прекопувања на улицата поради поставување приклучоци, од Општина Центар одговорија дека се обезбедени пари во општинската каса и дека тоа е неопходно да се направи, пред сѐ, поради поплаките од граѓаните и големите оштетувања на горниот слој на асфалтот.

-Во врска со реконструкцијата и приклучоците за инсталациите, на улицата ќе бидат оставени отвори (тн. изводи), на кои подоцна би се приклучиле водоводните, топлински, електрични и кабловски мрежи. Со изводите, нема да има потреба од повторно прекопување на улицата – тврдеа од Центар.

Сега, од Општината нема објаснување ниту одговор зошто не започна реконструкцијата на улицата, но и на повеќе други улици чија обнова требаше да се случи во летните месеци.

Сепак дел од она што беше започнато се заврши. Богдановиќ денеска информираше дека е завршена реконструкција на една од најфрекфентните сообраќајници во Капиштец, улицата „Народен Фронт“.

-Целосно е направена реконструкција на коловозот на површина од 11.542 квадратни метри и реконструирани се трите краци помеѓу зградите. Поставено е ново ЛЕД-осветлување и реконструирани се подигнатите пешачки платоа за смирување на сообраќајот. Воведуваме и резидентен паркинг на „Народен Фронт“ број 5,7,17,19,21,23, а вертикалната и хоризонталната сигнализација ќе биде обележана штом се подобрат временските услови – вели Богдановиќ.

Обновата на улицата чинеше 40 милиони денари, пари што беа обезбедени од општинскиот буџет.