Во Варшава вечерва протестираа Полјачки на повик на штрајкот на жените, антифашистите и земјоделците незадоволни од „локдаунот“ заради пандемијата, притоа фрлајќи со топки снег по полицајците кои пробувале да ги легитимираат и растераат.

Полицајците одговориле со солзавец, а организаторите соопштиле дека се уапсени четири демонстранти.

Полицијата предупреди дека протестите се нелегални бидејќи не се пријавени и дека на сила се санитарни мерки.

Демонстрантите скандирале „Имаме право да протестираме“, „Ова е војна“, „Соблечи ја униформата, извини и се на мајка ти“, „Полицијата ги крши законите и рацете на жените“; „Варшава слободна без фашизам“, а имало знамиња на ЛГБТ заедницата, како и знамиња на ЕУ.

Улични протести во Полска се одржуваат од 22 октомври заради пресудата на Уставниот суд да го забрани како противуставен претходно дозволениот вештачки прекин на бременоста кога плодот е тешко деформиран или заболен.

Рестриктивниот закон кој сега дозволува прекин на бременоста само ако е загрозен животот на мајката или бременоста е создадена преку силување и инцест, ги тера Полјачките да раѓаат и бебиња кои набргу ќе починат. Протестот против тој закон се претвори во демонстрации против владата на конзервативната партија Право и Правда.

Причината за вечерашниот протест е новиот предлог закон со кој граѓаните веќе нема да можат да одбијат да ги платат казните за прекршок додека чекаат да ги потврди судот.

Денеска во Варшава протестираа и сопствениците на туристичките агенции, хотелиерите, таксистите и другите превозници заради мерките против ширењето на коронавирусот, заради кои, како што рекле тие, останале без приходи, а помошта од државата е лошо организирана и недоволна.

Извор: Бета.рс