ФОТО | По 38 дена поминати на ГАК: Четворката бебиња од Штип си замина дома
На 21 октомври годинава, Благица и Александар Зикови станаа родители на првата четворка бебиња родени во Македонија од 2004 година досега.
Препорачано
Како што објавија од Клиниката за гинекологија и акушерство во Скопје, оваа брачна двојка од Штип вчера си замина дома со своите четири деца – ќерката Леонтина и синовите Михаил, Теодор и Ведран. Имено, новороденчињата, родени во 31. гестациска недела, поминаа 38 дена на одделението за интензивна нега и терапија.
„Михаил е роден со 1170 грама, а дома си замина со 1860 грама. Леонтина е родена со 1100, а ја испративме со 1810 грама. Теодор е роден со 1200 грама, а дома си замина со 1920 грама. Ведран е роден со 1370 грама, а од ОИНТ го испративме дома, во Штип, со 2000 грама“, соопштија од Клиниката за гинекологија и акушерство.
„Докторите и медицинските сестри и акушерки од Клиниката за гинекологија и акушерство на овие мали јунаци им посакуваат среќно детство исполнето со многу здравје, а на среќните родители Благица и Александар полна куќа детска смеа, многу радости и топлина во домот што ќе им ја донесат овие четири мали сонца“, додаваат оттаму.
Д-р Елена Ѓоргиевска – Николовска, која „на свет“ ги донесе Михаил, Леонтина, Теодор и Ведран вели дека е прекрасно чувството сите четири бебиња заедно да се испратат дома и порача дека тоа било огромен предизвик за сите кои биле дел од оваа среќна приказна.
