ФОТО | Пајо Паторот денеска полни 89 години: Нервозен, мрзоволен, но шармантен цртан лик
Многумина од нас пораснаа гледајќи ги цртаните филмови на „Дизни“, со ликот на Пајо Паторот, прикажан како нервозен, мрзоволен, но многу шармантен цртан лик.
На денешен ден, во 1934 година е емитуван првиот цртан филм со наслов „The Wise Little Hen“, во кој се појавува ликот на Пајо Паторот. Препознатлив по неговиот специфичен и неразбирлив говор, најчесто е прикажан во морнарска униформа и капа, со црна или црвена машна.
Неговиот разигран темперамент го доведува во разни неволји и кавги со пријателите. Лесно се нервира, а честопати покажува и љубомора. По примерот на неговиот вујко, Пајо многу го сака златото и богатството и постојано е опседнат со желбата да се збогати. Сепак, Пајо Паторот е прикажан како многу шармантен, лојален и добар пријател.
Цртаниот лик во неговите авантури го придружуваат девојката Пата, чие однесување често го „полудува“, Мики и Мини Маус, како и неговите внуци, на кои често им се фали со приказни од младоста.
Инаку, покрај цртаните долгометражни и краткометражни филмови, Пајо е познат и по неговото прикажување во многу стрипови. Една од неговите најпознати изреки е: „О момче, о момче, о момче!“.
Во 2004 година, овој цртан лик ја доби својата ѕвезда на Булеварот на славните во Холивуд, потврдувајќи ја својата титула како „најпознатата патка во светот“.