Вилата Холм сместена на четири хектари во Реџентс парк во Лондон, се очекува да достигне цена од 250 милиони фунти (околу 300 милиони долари), што ќе ја направи најскапата надвижност некогаш продадена во Обединетото Кралство.

Паднала во рацете на стечајните управители

Вилата Холм, изградена во 1818 година во Реџентс парк, излезе на пазарот како залог за огромен заем што го подигнаа сопствениците од Саудиска Арабија. Вилата е ставена во рацете на стечајните управители кои ја покренале продажбата, а се верува дека тоа ќе биде куќа која во досегашната историја на Лондон ја достигнала највисоката цена, пишува „Фајненшл тајмс“.

London’s most valuable house is up for sale for £300 million.

The Holme, a mansion inside Regent’s Park with four acres of land. pic.twitter.com/pj4HUt9ffp

— MTZ (@Tobeech) March 2, 2023

Вилата Холм веќе го привлече вниманието на екстремно богатите купувачи, а агентите задолжени за продажба на оваа недвижност очекуваат цената да биде околу 300 милиони долари. Тоа би ја надминало цената на претходната најскапа куќа во Лондон, вилата вредна 210 милиони фунти со поглед на Хајд парк, која ја купи основачот на „Евергранд“, еден од најбогатите Кинези, Хју Ка Јан.

Продажбата на вилата и необичните околности околу неа даваат ретка можност да се ѕирне во бизнисот на богатите странски инвеститори на лондонскиот пазар на недвижности – во трансакциите кои најчесто се обвиткани со вел на тајност.

Вилата паднала во рацете на стечајните управители како залог за заем од околу 150 милиони фунти, заедно со куќа во Њујорк и авион, но извор изјавил за „Фајненшл тајмс“ дека аранжманот истекол.

40 соби, тениски терен…

Вилата Холм има 40 спални соби и импресивни 2.700 квадратни метри станбен простор. Покрај безброј соби, вилата има осум гаражи, тениско игралиште, библиотека, сауна и голема трпезарија. Имотот има и уредено езеро, простран тревник и бујно зеленило.

Многумина оваа вила ја споредуваат со Белата куќа во Вашингтон поради нејзината фасада и големина.

Оваа 205 години стара вила, една од малиот број барани резиденции лоцирани во централниот парк во Лондон, е изградена како дом за Џејмс Бартон, инвеститор за недвижности, кој изградил над 3.000 објекти во централните делови на Лондон.

Упатените тврдат дека во моментот двајца од тројцата потенцијални купувачи кои пројавиле интерес за вилата се од Лондон, а третиот е од странство. Се претпоставува дека вилата ќе ја купи инвеститор, а не семејство што планира да живее во неа. Холм го привлекува интересот на странските инвеститори, исто како и другите куќи во скапите лондонски области. Имено, 48 отсто куќи во најскапите делови на Лондон во првите шест месеци во 2022 година е продадено на меѓународни купувачи.