ФОТО | Ова е актерот што ќе го глуми Дражен Петровиќ во филмот за „кошаркарскиот Моцарт“
Младиот хрватски актер Домагој Нижиќ (25) ќе го толкува прерано починатиот кошаркар Дражен Петровиќ во претстојниот биографски филм за „кошаркарскиот Моцарт“.
Филмот ќе биде снимен во режија на Данило Шербеџија, а целиот проект ќе се изреализира по иницијатива на продуцентот Љубо Зџеларевиќ и Ивор Шибер.
„Со многу верба, надеж, љубов и посветена работа ќе се обидам да ја применам неговата личност во својата работа, тренирајќи. Така што, се надевам дека ќе успеам да го претставам Дражен во актерството“, изјави Нижиќ за „РТЛ“.
Актерката Зринка Цвитешиќ ќе ја толкува улогата на Бисерка Петровиќ, мајката на Дражен Петровиќ.
Инаку, висинската разлика меѓу актерот и починатиот кошаркар е само еден сантиметар. И самиот Нижиќ се занимавал со спорт, поточно со одбојка.
„Тој е пример за сите млади луѓе – не само за спортистите, туку и за останатите. Тој е пример за тоа како треба да се живее животот и како со одрекувањето доаѓа голема одговорност, со која доаѓа и голема убавина. Мислам дека тој ни ја остави таа убавина на сите нас. Тоа е наследство со кое сите ние треба да живееме во иднина“, заклучи актерот.
Дражен Петровиќ беше југословенски и хрватски кошаркар, еден од најдобрите европски кошаркари на сите времиња. Тој ја започна својата кариера во КК Шибенка, па продолжи во КК Цибона и КК Реал Мадрид, со кој имаше најмногу успеси. Кариерата ја продолжи во НБА клубовите Портланд Трејл Блејзерс и Њу Џерси Нетс.
Со репрезентацијата на Југославија освои бронзен и сребрен медал на Летните олимписки игри во 1984 и 1988, а со репрезентацијата на Хрватска освои сребрен медал во 1992. Во 1985 година, тој ја прими наградата „Златна значка“ на списанието „Спорт“, наградa за најдобар спортист во тогашна СФРЈ.
Петровиќ трагично го загуби животот во сообраќајна несреќа во Германија на 7 јуни 1993.