ФОТО | Отворен најдолгиот висечки пешачки мост во светот: Се наоѓа во Португалија и е долг 516 метри
Денеска е отворен најдолгиот висечки пешачки мост во светот, во близина на градот Арука во северна Португалија.
На шеесет километри од Порто, во градот Арука, денеска беше отворен мост долг 516 метри, кој се наоѓа над кањонот на реката Паива во рамки на националниот парк заштитен од УНЕСКО. Тој е изграден на 175 метри над земјата и е 1,2 метри широк.
Овој најдолг висечки мост е направен од челични кабли и метални решетки, а поставен е помеѓу два огромни бетонски столба и од денеска е отворен само за локалното население, додека од понеделник секој може да резервира посета.
Властите и жителите на Арука се надеваат дека оваа единствена атракција, чија изградба чинеше околу 2,3 милиони евра и траеше околу две години, ќе помогне во заживување на регионот, особено по разорната пандемија на ковид-19.