Предложениот проект од 5 милијарди долари има цел да го подигне Дубаи во нови височини со тоа што симболот на ноќното небо ќе се „спушти долу“ на Земјата, пренесува „Ап Њус“.

Канадскиот претприемач Мајкл Хендерсон замислил реплика на Месечината со пречник од 274 метри што ќе стои на врвот на зграда висока 30 метри во Дубаи.

Проектот на Андерсон едноставно наречен „Месечина“ лесно би се вклопил во футуристичкиот дизајн на градот. Покрај фактот што многу големи и скапи проекти пропаднаа, претприемачот вели дека неговата идеја воопшто не е тешка за остварување.

„Го имаме најголемиот бренд на светот. Осум милијарди луѓе знаат за тоа, а ние сè уште не сме почнале“, изјави тој за АП, мислејќи на сателитот на Земјата.

Проектот би вклучувал огромен комплекс од одмаралиште со хотел со 4.000 соби, арена со 10.000 седишта и „лунарна колонија“ која би можела да симулира живот на Месечината. Џиновската сферична зграда би била поставена на кружен постамент и навечер би светела.

Андерсон ја претстави својата визија на саемот за арапски туризам овој месец во Дубаи. Дизајнерите веќе направија неколку графички прикази каде би се наоѓала „Месечината“, вклучително и во близината на облакодерот „Бурџ Калифа“.

Втората локација е на местото на бисерот на Дубаи, во близина на архипелагот „Палм Јумеирах“, проект кој долго време е недовршен и сега е во процес на уривање. Третата локација може да биде на местото на „Палм Џебел Али“, уште еден неуспешен проект.

Ова се два проекти кои останаа недовршени поради финансиската криза во 2008 и 2009 година, кои тешко го погодија Дубаи, принудувајќи го Абу Даби да обезбеди финансиска помош од 20 милијарди долари.

Речиси 15 години подоцна, во Дубаи ситуацијата е поинаква. Изнајмувањата на живеалиште во просек се зголемени за 26,9 отсто на годишно ниво, дури и со заштита против зголемување на цените. Дубаи забележа 86.849 продажби на станбени објекти минатата година, надминувајќи го претходниот рекорд од 80.831 од 2009 година.