Во петок и сабота, односно на 17-ти и 18-ти овој месец во Штип ќе се одржи 36-то издание на најреномираниот музички фестивал „Макфест“.

Во петок ќе настапат дебитантите, а само неколкумина од нив, односно тие со највеќе гласови ќе се натпреваруваат и во саботната, односно финалната вечер каде ќе учествуваат веќе докажани имиња од домашната сцена.

Меѓу нив, односно во финалната вечер ќе настапи и миленичката на публиката, младата и талентирана Лара Иванова. Нејзината композиција носи наслов „Душа“, на која како автор на музиката и аранжманот се потпишува Иле Спасев, додека пак текстот е повторно дело на маестралниот Робин Зимбаков.

Лара на сцената во Штип ќе носи креација на познатиот дизајнер Занов, со кого од неодамна почна да соработува.

– Со нетрпение го чекам „Макфест“. Ова ќе биде мој трет настап, но се радувам исто како првиот пат. Не се оптеретувам со тоа дали ќе освојам некаква награда, за мене најважно е песната да биде прифатена од публиката и утре да ја пеат кога ќе настапувам некаде – кусо ни изјави Лара.

Инаку за оваа песна, Лара и нејзиниот тим веќе снимија видеоспот кој ќе биде промовиран за неколку дена.