ФОТО l Родителите на протест во Штип: Учениците да учат од книга, а не од компјутер!
Покрај главниот протестен марш во Скопје и во другите градови пред општинските згради се одржаа протести на родителите против дигитализацијата во образованието, па така и во Штип неколку десетици граѓани со своите деца го искажаа својот револт.
– Имам две деца и од финансиска гледна точка не ја поддржувам дигитализацијата. Немам услови и на двете деца да им обезбедам да учат од компјутер. Покрај тоа, ние сме против ова и од здравствен аспект, децата треба да учат исто како и ние, од книга, порача Тодорка Ѓошева, родител на две деца, која е дел од протестниот марш на родителите во Штип.
На протестот многу родители излегоа и со нивните дечиња, со цел да покажат дека ниту тие не ги поддржуваат новите реформи на Царовска.
Покрај родители и деца, на протестот имаше и незадоволни наставници.
– Дигитализацијата е лоша од здравствен аспект пред се. Замислете постојано пред компјутер или таблет, се криви рбетот, а на децата ќе им се оштети и видот. Како родител и наставник не ги поддржувам овие реформи – вели наставничката Билјана Алексова на протестот, додавајќи оти таа не верува оти училиштата ќе им обезбедат таблети на учениците.
– Не верувам дека учениците ќе добијат таблети и компјутери од државата, не верувам во тие тврдења. Тоа ќе падне на грб на родителите. Но, дури и да се обезбедат технички помагала ние бараме да се учи само од книга – додава Алексова одговарајќи на новинарско прашање на Слободен печат.
Покрај ставот против дигитализацијата, родителите во Штип побараа и учениците да се вратат на училиште со физичко присуство, посочувајќи оти тоа е за нивно добро и за правилен развој на секој ученик.