Генералното собрание на ОН денеска гласаше за исклучување на Русија од Советот за човекови права. За протерување на Русија гласаа 93 земји, 24 беа против, а 58 беа воздржани.

Северна Македонија е меѓу земјите кои гласаа „за“ руското исфрлање од Советот за човекови права на ОН.

На фотографијата од гласањето може да се видат неколку држави кои направија изненадувачки потег.

Очекувано, меѓу државите кои гласале против ваквиот потег се Белорусија, Русија, Кина, Северна Кореја и Иран. Тука спаѓаат и Алжир, Боливија, Бурунди, ЦАР, Конго, Куба, Еритреја, Етиопија, Габон, Казахстан, Киргистан, Лаос, Мали, Никарагва, Сирија, Таџикистан, Узбекистан, Виетнам и Зимбабве.

Изненадувачки потег на Србија

Сите земји од Балканот, вклучително и Србија, која засега одбива јавно да ја осуди руската агресија врз Украина, гласале „за“ исфрлање на Русија од Советот.

Протерувањето на Русија го предложија Велика Британија и САД поради масакрот во Буча.

Пред гласањето во ОН, украинскиот амбасадор Серхиј Кислиција ја обвини Русија за „ужасни“ кршења на човековите права и зборуваше за масакрот во Буча, град во близина на Киев, каде Украина ги обвинува Русите за убиство на десетици цивили.