Целосно е изгорен објектот во кој работеше дискотеката „Пулс“ во Кочани, каде синоќа изби катастрофален пожар и загинаа над 50 луѓе, а повеќе од 120 се повредени.

Полицијата претпладнево го обезбедуваше пеплосаниот објект.

Местото е затворено во поголем дијаметар со полициски ленти и не се дозволува пристап до објектот, кој се наоѓа на влезот на Кочани кај индустриската зона во градот.

Лице што ги вадело телата од дискотеката за „Слободен печат“ кажува дека целиот паркинг пред дискотеката бил полн со тела кои цела вечер се извлекувале. Најголем дел од жртвите биле изгорени, а според нивните информации, бројката ќе се зголемува затоа што имало многу тешко повредени.

Пред местото поминаа и воени санитетски возила. Тим од обвинители е на местото на несреќата, меѓу нив и републичкиот обвинител Љупчо Коцевски. Околу дискотеката нема куќи во кои се живее, туку само еден хотел, кој е затворен и од кој Обвинителството ги бара снимките од надзорните камери.

Според првичните информации, пожарот избил откако на концертот на групата „ДНК“ била користена пиротехника. Во супстандардната дискотека, сместена во објект кој порано служел како магацин на продавница за теписи, имало многу повеќе луѓе од капацитетот на објектот. Од запалените факели, според неофицијални информации, пламнал покривот на „дискотеката“, кој за само неколку минути се урнал.

ВИДЕО | Чад, паника – бројни загинати и повредени во пожарот во дискотеката „Пулс“