Италија тргна во олабавување на рестрикциите за заштита од коронавирусот, па вчера, во најголем дел од земјата, се отворија кафулињата. По строгите мерки за време на празничниот период (Божик и Нова година), две третини од Италијанците ги задоволува критериумите за т.н. „жолта зона“ во која е дозволено, во помалку загрозените подрачја, повторно служење на маси и шанкови.

– Мртво се чувствувавме без кафулињата. Убаво е да се дојде овде и да се поразговара со луѓето зад шанкот. Нè прават живи секое утро пред да заминеме на работа, вели Тицијана Балдо, римјанка која беше послужена со филџан кафе во центарот на италијанската престолнина.

Додека голем дел од Европа е под строг „локдаун“, кафулињата и рестораните во делови на Италија повторно почнаа да служат гости по маси и шанкови од шест часот попладне. Потоа им е дозволено да служат само „пијалок за надвор“ и така до 22 часот навечер, кога почнува т.н. „полициски час“ што трае до 5 часот наутро.

Отворени и туристичките атракции

Покрај рестораните и кафулињата, отворени се и туристичките атракции како Колосеумот, објект што беше два месеца под клуч. Отворени за посетители се, исто така, и музеите во Ватикан.

– Пресреќен сум. За првпат се случува нешто позитивно по појавата на ковид-19. Ја видов Сикстинската капела, сега Колосеумот. Фантастично е, рече Беноа Дупле, турист од Белгија.

Туризмот е една од најважните гранки на економијата на Рим.