ФОТО | Груби: Со употребата на албанскиот јазик не загуби никој, а се добија многу полојални граѓани

Артан Груби / Фото: Facebook/Артан Груби

Сведоци сте дека во Влада се зборува албански јазик, секој ден во Собранието се зборува албански, како и во канцеларијата на претседателот на државата, но најважно од се е дека од употребата на албанскиот јазик, како придобивка од Охридскиот рамковен договор не изгуби никој, најмалку изгубија Македонците, напротив се добија многу полојални заедници, многу полојални граѓани затоа што колку е полојална државата кон граѓаните и заедниците, толку се полојални граѓаните и заедниците кон државата, нагласи денеска првиот вицепремиер и министер за политички систем и односи меѓу заедниците Артан Груби.

Тој, на денешниот настан, што се одржа во низата случувања по повод одбележувањето на 20-годишнината од Охридскиот рамковен договор, нагласи дека употребата на албанскиот јазик е еден од столбовите на Охридскиот договор.

Во рамки на денешниот настан, што беше организиран од страна на Агенцијата за примена на јазикот, беа врачени сертификати на преведувачи на албански јазик кои работаат во државните институции.

Мила Царовска
Фото: Facebook/Мила Царовска

Министерката за образование и наука Мила Царовска, по тој повод истакна дека како Влада покажале оти посветено работат да создадат образование коешто се грижи за сите ученици и кое што нуди можност секој ученик да учи на својот мајчин јазик, не само да учи, туку и да дискутира за културата на другите коишто живеат блиску во неговата заедница.

– Ако заедно чувствуваме дека припаѓаме на оваа држава, дека заедно се бориме за нејзината иднина и за нејзината благосостојба, како и на секој граѓанин, тогаш навистина можеме заеднички да постигнеме многу повеќе. Новата концепција за основно образование, токму тоа го предвидува. За прв пат во основното образование во нашата држава се поставуваат три вредносни столбови. Еден од клучните столбови е интеркултура, како заеднички да создаваме граѓани кои што се грижат едни за други, коишто учат и зборуваат на својот мајчин јазик и сите заедно придонесуваат кон развој на државата и економски и социјален, наведе Царовска.

Министерката за образование и наука посочи дека другите два столба се инклузивноста, што значи дека на секој еден треба да му дадаме можност да го постигне својот максимален потенцијал, независно од каде доаѓа и колку може, а третата компонента е родовата рамноправност – и жените и мажите да можат да го постигнат својот полн потенцијал во нашата држава.

– Само такво образование може да понуди просперитет на земја којашто се стреми да ги постигне европските стандарди, но и свестските стандарди, затоа што тие претпочитаат почитување на моето право, почитување на правото на тој до мене и заедничко градење на иднината, заклучи Царовска.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 60 ДЕНАРИ

Видео на денот