Како што утрово објавивме, во текот на минатата ноќ, околу 2 часот, „Тигрите“ на МВР го упасија познатиот бандит, рекетар и насилник Зулќуфли Нуредини, познат како Малиот Репки од Батинци, кој бил лоциран во велешко.

Веста преку соопштение ја потврди и МВР:

– Полициски службеници од САЕ Тигар во координација со АНБ на 2.10.2021 во 1.40 часот во месноста Лавчани на територија на Велес го приведоа З.Н. (30) од с. Батинци кој се барал со потерница поради основано сомнение за повеќе сторени кривични дела, меѓу кои две „обид за убиство“. Лицето ќе биде предадено на надлежното обвинителство, стои во соопштението на полицијата.

Малиот Репки е озлогласен криминалец кој повеќе години се криеше од правдата и малтретираше и рекетираше бизнисмени од скопскиот, тетовскиот и кумановскиот регион, а организатор е и на повеќе грабежи. Но, синоќа падна во стапицата на специјалците на МВР и сега ќе мора да се соочи со правдата, а граѓаните од овие региони нема повеќе да стравуваат од овој насилник.