Првата дама на Америка, Џил Бајден стана топ тема на социјалните мрежи, откако со својот моден избор ги разгоре „сеќавањата“ за нејзината претходничка, Меланија Трамп…

Американската претседателска двојка го започна своето прво патување во странство оваа недела. Вчера, Џо Бајден, со својата сопруга Џил Бајден се сретнаа со британскиот премиер и неговата новопечена сопруга во заливот Карбис во Корнвол.

Првата дама на Америка, која минатата недела го прослави својот 70-ти роденден, во последните неколку недели привлече големо внимание со нетипичен моден избор. А овојпат изненади многумина кога се појави во црн блејзер на кој беше испишано „Љубов“ со блескави циркони.

Имено, не ѝ требаше на јавноста долго нејзиниот моден избор да го окарактеризира како критика кон нејзината претходничка, 51-годишната Меланија Трамп.

Во 2018 година, сопругата на поранешниот претседател на САД се појави во модел на маслинесто зелена јакна со натпис на задната страна „Навистина не ми е гајле, а тебе?“. Нејзиниот избор тогаш предизвика бурни реакции во јавноста, а во нејзина одбрана Меланија рече дека нејзиниот избор на јакна со контроверзниот натпис е порака упатена до „сите оние луѓе и левичарските медиуми кои постојано ја критикуваат“.

Сепак, јавноста не ја разбра пораката на тој начин затоа што таа ја носеше на пат кон мексиканската граница за да ги посети децата одделени од нејзиното семејство.

Наследничката на Меланија, пак, тврди дека нејзиниот избор на блејзер со натпис „Љубов“ е далеку од тоа како јавноста го доживува.

Според неа, ова е нејзиниот повик за единство. „Ова е глобална конференција на која ќе се обидеме да воспоставиме единство низ целиот свет и мислам дека е важно да се работи на тоа чувство на единство“, рече Бајден.